قصیده المربعه ( اسولف عالزمان) جعفر عبدالمهدي العبادي

گاعد ابروحی او اسولف عالزمان

لن ضمیری ایصیح دنیانه امتحان

لن اسمعه ایصیح دنیانه الممر

تحوي کلش زین واتجید الغبر

والدرب ماشي ولا منّه المفر

لازم انته اتطوف واتمر کل مکان

لازم انته اتطوف واتمر الدیار

اتعاشر الطیبین واتعاشر شرار

لاتضل محجوب وبخَلفِ الستار

کلشي کون اتشوف لا تغمض جفان

کلشي کون اتشوف من هذه العصر

لا تخلي إبغفله کل عمرک یمُر

دنیتک یومین وایخلص العمر

لا تخله ایروح بس لفضة لسان

لا تخله ایروح بل گال او گلت

خلي چلمة زینه لو باچر رحت

أرّخ اکتب کلشي بي هذه الوکت

صافح الناطور سرّاق الأمان

صافح الناطور مو عجبه  او عجب

شفت أخس من هاي مر اعله الشعب

صاحِب الحگ لکن  ابیته  احتجب

خایف المطلوب یطلع هوّه دان

خایف  المطلوب من حگه  اکید

وکت مرته إبّیته في منهج  یزید

تطلع ابعاشور بس کشختهه عید

هذه حال ازماننه او بعض البیان

هذه حال ازماننه الیشبه سعیر

راح اگلک عالغني او حال الفقیر

ما سئل جاره ولا یدري اشیصیر

او یطلب امن الله ینطیه الجنان

یطلب إمن اللّه  راید  جنته

لکن اهوه الدنیه کلش غرته

من أجل تومان عارکهه اخوته

ماعرف هالدنیه مگضیه وفان

****

جعفرعبدالمهدی العبادی